മാനസികമായും, ശാരീരികമായും, "ഐ.എം.എഫ് പരമായും" എന്തിന് ലൈംഗീകപരമായും പരമതൃപ്തനായ ഒരുവന്റെ നട്ടപ്പിരാന്തുകള്‍

Thursday, December 09, 2010

5 - ബ്ലാക്ക് & വൈറ്റ് അഭിമുഖം (ശ്രീ. നിരക്ഷരന്‍)

ഇടക്കാലത്ത് ചില തിരക്കുകളാലും, ഒപ്പം ആഗ്രഹിച്ച ചില അഭിമുഖങ്ങള്‍ കിട്ടാത്തതിനാലും , അതിലേറെ എന്റെ മടി കാരണവും മുടങ്ങിപ്പോയ “ബ്ലാക്ക് & വൈറ്റ് അഭിമുഖം” വീണ്ടും ആരംഭിക്കുകയാണ്. 

യാതൊരു തരത്തിലുമുള്ള പരിചയപ്പെടുത്തലുകളും ആവിശ്യമില്ലാത്ത ശ്രീ. മനോജ് രവീന്ദ്രന്‍ എന്ന ബൂലോകത്തെ പ്രശസ്തനായ ബ്ലോഗര്‍ നിരക്ഷരനാണ് ഇപ്രാവിശ്യം അഭിമുഖത്തില്‍ വരുന്നത്. 

ഒരു വ്യക്തിയെന്ന നിലയില്‍ നിരക്ഷരനോട് എനിക്ക് ആദരവും ഒപ്പം അതിലേറെ അസൂയമാണെനിക്ക് തോന്നുന്നത്. സഹജീവികളോടും ഒപ്പം താന്‍ ജീവിക്കുന്ന ഭൂമിയോടും കാണിക്കുന്ന കരുതലും സഹാനുഭുതിയുമാണ് എനിക്ക് നിരക്ഷരനില്‍ ആദരവുണ്ടാക്കുന്നത്, എന്നാല്‍ മറിച്ച് അസൂയയുളവാക്കുന്നത്, അദ്ദേഹത്തിന്റെ സൌഹൃദത്തിന്റെ വ്യാപ്തിയും, അതിലൂടെ അനുഭവിക്കുന്ന ഊഷ്മളതയും ആലോചിച്ചിട്ടാണ്. നിരക്ഷരന്റെ കൂടെ ഒരു യാത്രയില്‍  സഹയാത്രികനാകാന്‍ ആഗ്രഹിക്കാത്ത ബ്ലോഗേഴ്സ് വളരെ കുറവായിരിക്കും. ഒരു പക്ഷെ നിരക്ഷരന്‍ എഴുതുന്ന യാത്രക്കുറിപ്പുകള്‍ വായിച്ച് അവര്‍ സ്വയം നിരക്ഷരന്‍ ആവുന്നുമുണ്ടാവാം. 

നിരക്ഷരന്‍ മനസ്സില്‍ ആഗ്രഹിക്കുന്ന കൂടുതല്‍ യാത്രകളും, കര്‍ത്തവ്യങ്ങളും,  ഒപ്പം സന്തോഷപ്രദമായ ഒരു ജീവിതവും കൈവരാന്‍ ജഗദീശ്വരന്‍ അനുഗ്രഹിക്കട്ടെയെന്ന് പ്രാര്‍ത്ഥിച്ചുകൊണ്ട്.  

1. നിരക്ഷരനും മുഴുപ്പിലോങ്ങോട്ടുകാരിയും ഒപ്പം നേഹയും. കുടുംബത്തെക്കുറിച്ച് അല്പം. നേഹയ്ക്കുമാത്രമുള്ളതായിരിക്കുമോ ഈ അച്ഛനും, അമ്മയും.?
തെ.  മുഴുപ്പിലോങ്ങോട്ടുകാരിയല്ല..മുഴങ്ങോടിക്കാരി. അവര്‍ ജനിച്ച സ്ഥലമെന്ന നിലയ്ക്ക് പാസ്സ്പ്പോര്‍ട്ടില്‍ വരെ ആ സ്ഥലപ്പേരുണ്ട്. പക്ഷെ അവരാ സ്ഥലം കണ്ടിട്ടുപോലുമില്ല. അതില്‍ ഒരു കളിയാക്കലിനുള്ള സ്കോപ്പ് ഉണ്ടല്ലോ ? അതാണ് ഞാന്‍ ആ പേര് എഴുത്തിലൊക്കെ സൂചിപ്പിക്കുന്നത്. 



നിരക്ഷരന്‍ എന്നാല്‍ ...നിറയെ അക്ഷരങ്ങള്‍ക്കും, ഒരുപാട് നല്ല നല്ല എഴുത്തുകാര്‍ക്കും ഇടയില്‍ എഴുത്തിന്റെ മാസ്മരിക വശങ്ങള്‍ ഒന്നുമറിയാത്ത ഒരാള്‍ എന്നാണ് ഞാന്‍ അര്‍ത്ഥമാക്കുന്നത്. പലതരം ഒച്ചകള്‍ക്കും ബഹളങ്ങള്‍ക്കും ഇടയില്‍ നിശബ്ദത ആഗ്രഹിക്കുന്ന ഒരാളെന്നും വേണമെങ്കില്‍ പറയാം. നേഹയ്ക്ക് മാത്രമുള്ളതായിരിക്കുമോ ഈ അച്ഛനും അമ്മയും എന്ന ചോദ്യത്തിന് ഞങ്ങള്‍ക്കിനി കൂടുതല്‍ സന്താനങ്ങള്‍ ഉണ്ടാകില്ലേ /വേണ്ടേ  എന്നൊക്കെ കൂടെ അര്‍ത്ഥമുണ്ടോ ? അതോ മറ്റെന്തെങ്കിലുമാണോ ഉദ്ദേശിക്കുന്നത് ? എന്തായാലും നേഹയ്ക്ക് ഞങ്ങളല്ലാതെ വേറൊരു അച്ഛനും അമ്മയും ഉണ്ടാകാനുള്ള സാദ്ധ്യത ഇനിയില്ല :)
2. മനുഷ്യന്‍ സമ്പത്തിന്റെ കാര്യത്തില്‍ ഒത്തിരിയൊത്തിരി സ്വാര്‍ത്ഥനായിപോവുന്നുവെന്ന് ലോകം നിലവിളിക്കുമ്പോഴും, ബില്‍ഗേറ്റ്സും മറ്റും തന്റെ സ്വത്തിന്റെ 50% ചാരിറ്റിയ്ക്കായി മാറ്റിവയ്ക്കുന്നു. അണ്ണാര്‍ക്കണ്ണനും തന്നാലായത് എന്ന നിലയില്‍ നിരക്ഷരനും, നിരക്ഷരന്റെതായ കര്‍ത്തവ്യങ്ങള്‍ സമാനമനസ്ക്കരായ ഒത്തിരി കൂട്ടുകാരുമായി ചേര്‍ന്ന് ചാരിറ്റി പ്രവര്‍ത്തനങ്ങളില്‍ ഏര്‍പ്പെടുന്നു.ലൌകികസുഖങ്ങളില്‍ നിന്നും വ്യത്യസ്തമായ എന്തുതരം അനുഭൂതിയാണ് സഹായം സ്വീകരിക്കുന്ന ആളുകളുടെ വിടര്‍ന്ന ചിരിയില്‍ നിന്നും നിരക്ഷരന് കിട്ടുന്നത്?
നട്ടപ്രാന്തന്‍ കാണുന്ന നിരക്ഷരന്റെ പ്രവര്‍ത്തനങ്ങള്‍ ബൂലോകത്തേയും ഇന്റര്‍നെറ്റിലേയും സുഹൃത്തുക്കളുമായി ചേര്‍ന്നുള്ളതാണ്. അതില്‍ നിരക്ഷരന് മാത്രമായി അവകാശപ്പെടാന്‍ ഒന്നുമില്ല. കൊല്ലത്തില്‍ 6 മാസം ജോലിയൊന്നും ചെയ്യാത്ത ഒരാളായതുകൊണ്ട് ബൂലോക-ഇന്റര്‍നെറ്റ്  സുഹൃത്തുക്കള്‍ക്ക് വേണ്ടി അല്‍പ്പം സമയം ചാരിറ്റി പ്രവര്‍ത്തനങ്ങള്‍ക്ക് നീക്കിവെക്കുന്നു എന്ന് മാത്രം. അതിനായി നിരക്ഷരന്‍ ചിലവഴിക്കുന്ന സാമ്പത്തികം അവരാരും ചിലവാക്കുന്നതിന്റെ അടുത്ത് പോലും വരില്ല.  (ബില്‍ ഗേറ്റ്സിന് ഇവിടെന്ത് കാര്യം ? :) :)
എറണാകുളത്ത് മുരുകന്‍ എന്നൊരു ഓട്ടോറിക്ഷാ ഡ്രൈവറുണ്ട്. തെരുവിലെ കുട്ടികളുടെ ഉന്നമനത്തിനായി അഹോരാത്രം കഷ്ടപ്പെടുന്ന ഒരാളാണ് മുരുകള്‍. കിട്ടുന്ന പണത്തില്‍ ഭൂരിഭാഗവും കുട്ടികള്‍ക്കായി ചിലവാക്കുന്ന ഒരു ചെറുപ്പക്കാരന്‍. ഒരിക്കല്‍ വനിതയില്‍ വന്ന ഒരു ലേഖനത്തിലൂടെയാണ് മുരുകനെപ്പറ്റി ഞാന്‍ മനസ്സിലാക്കുന്നത്. പിന്നീട് ഒന്നുരണ്ടുപ്രാവശ്യം വിളിച്ച് സംസാരിച്ചിട്ടുമുണ്ട്. തെരുവുകുട്ടികളുടെ കാര്യത്തില്‍ മാര്‍ഗ്ഗനിര്‍ദ്ദേശങ്ങള്‍ നല്‍കാനായി ഒരു പുസ്തകം തന്നെ സ്വന്തമായി മുരുകന്‍ എഴുതിയിട്ടുണ്ട്. പക്ഷെ അത് പ്രിന്റ് ചെയ്ത് ഇറക്കാനുള്ള പണം ആ സാധുവിന്റെ കൈയ്യില്‍ ഇല്ല. ഈയടുത്ത് ഞാന്‍ പരിചയപ്പെട്ട വയനാട്ടുകാരനായ കുഞ്ഞഹമ്മദിക്കയും ഇതുപോലെ താഴേക്കിടയില്‍ നിന്നുകൊണ്ടുതന്നെ മുഴുവന്‍ സമയവും ജീവകാരുണ്യപ്രവര്‍ത്തനങ്ങള്‍ ചെയ്യുന്നവരാണ്. ബില്‍ ഗേറ്റ്‌സ്, നിരക്ഷരന്‍ എന്നീ പേരുകള്‍ മുരുകന്റേയും കുഞ്ഞഹമ്മദിക്കയുടേയും കൂടെ  ചേര്‍ത്ത് പറയാന്‍ പോലും യോഗ്യതയില്ലാത്തതാണ്.


 ചാരിറ്റി പ്രവര്‍ത്തനങ്ങള്‍ സ്കൂള്‍ വിദ്യാഭ്യാസ കാലം മുതല്‍ക്കേ ചെയ്യുന്നതാണ്. അന്ന് മുതല്‍ ബ്ലോഗ് ലോകത്ത് വരുന്നതുവരെ അതിനൊക്കെ ഒരു രഹസ്യസ്വഭാവം ഉണ്ടായിരുന്നു. ഇപ്പോള്‍ അതില്ല എന്ന വ്യത്യാസം മാത്രം. അതുകൊണ്ടുതന്നെ അന്ന് കിട്ടിയിരുന്ന സന്തോഷവും ചാരിതാര്‍ത്ഥ്യവും ഇപ്പോള്‍ കിട്ടുന്നില്ല. വിമര്‍ശനങ്ങള്‍ തന്നെയാണ് പ്രധാന കാരണം. ഇത്തരം കാര്യങ്ങള്‍ക്ക് ഒരു കൈ ചെയ്യുന്നത് മറുകൈ അറിയരുത് എന്ന രീതി തന്നെയാണ് നല്ലത്.  
3. സ്വന്തം രാഷ്ട്രീയവും, മതപരവുമായ അസ്ഥിത്വവും തുറന്നു പറയുന്നതില്‍ നിരക്ഷരന്‍ ഓടിയൊളിക്കുന്നുവെന്ന വിമര്‍ശനത്തെ എങ്ങിനെ കാണുന്നു?.
അതൊരു ശരിയായ വിമര്‍ശനമാണ്. രാഷ്ട്രീയവും മതപരവുമായ കാര്യങ്ങള്‍ എത്ര നേരം വേണമെങ്കിലും സംസാരിക്കാന്‍ ഞാന്‍ തയ്യാറാണ്.  പക്ഷെ അത്തരം സംസാരങ്ങള്‍ നല്ല രീതിയില്‍ അല്ലെങ്കില്‍ സമാനമായ രീതിയില്‍ മനസ്സിലാക്കാനും ചര്‍ച്ച ചെയ്യാനും പോന്ന വ്യക്തികള്‍ കുറവാണ് ഇന്നത്തെ സമൂഹത്തില്‍. എന്റെ മതമാണ് മികച്ചത്, എന്റെ പാര്‍ട്ടിയാണ് മികച്ചത് എന്ന്  ബാലിശമായി സംസാരിക്കുന്നവരോട് എന്ത് പറഞ്ഞിട്ടും കാര്യമില്ലല്ലോ ? സ്വാഭാവികമായും ഇത്തരം ചര്‍ച്ചകള്‍  സ്പര്‍ദ്ധയിലേക്ക് എത്തിച്ചേരുന്ന കാഴ്ച്ചയാണ് ചുറ്റുമൊക്കെ കാണുന്നത്.  ഇക്കാര്യത്തില്‍ ഈയിടെ ബ്ലോഗര്‍ സജി മാര്‍ക്കോസ് പറഞ്ഞ ഒരു വരി ഒരു മഹത് വചനമായിത്തന്നെയാണ് ഞാന്‍ കാണുന്നത്. “ തീരെ സമയമില്ല വഴക്കുണ്ടാക്കി നടക്കാന്‍. വേറെ എന്തൊക്കെ നല്ല കാര്യങ്ങള്‍ കിടക്കുന്നു. അതില്‍ ശ്രദ്ധ ചെലുത്താമല്ലോ ? ”


ഓടിയൊളിക്കുന്നതല്ല, ഒഴിവായി നില്‍ക്കുന്നതാണ്. ഈ രണ്ട് വിഷയത്തിലും വ്യക്തമായ കാഴ്ച്ചപ്പാടുകള്‍ ഉള്ള ഒരാളാണ് ഞാന്‍.  മതപരമായ അസ്ഥിത്വം വേണമെങ്കില്‍ ഇപ്പോള്‍ വ്യക്തമാക്കാം. ഹിന്ദു കുടുംബത്തിലാണ് ജനിച്ചത്. പക്ഷെ കൃത്യമായി അമ്പലത്തില്‍ പോകുകയോ പ്രാര്‍ത്ഥനകളില്‍ മുഴുകുകയോ പതിവില്ല. ശാന്തതയും നിശബ്ദതയും ഉള്ള എല്ലാ മതസ്ഥരുടേയും ദേവായലങ്ങളില്‍ നിശബ്ദമായി ഇരുന്ന് നോക്കിയിട്ടുണ്ട്. എല്ലായിടത്തുനിന്നും കിട്ടിയത് ഒരേ തരത്തിലുള്ള ശാന്തതയും സമാധാനവും തന്നെയായിരുന്നു. ഒച്ചപ്പാടും ബഹളവും ഉള്ള ഒരു ദേവാലയത്തിലും മരുന്നിന് പോലും ദൈവമില്ല, അവിടൊക്കെ പോകുന്നത് വീഗാലാന്റില്‍ പോകുന്നതുപോലെ ഒരു പ്രക്രിയ മാത്രമാണെന്നും ഞാന്‍ വിശ്വസിക്കുന്നു.
രാഷ്ട്രീയവും മതവും വളരെ ഡെലിക്കേറ്റായിട്ടുള്ള 2 വിഷയങ്ങളാണ്. പ്രതിപക്ഷ ബഹുമാനത്തൊടെ, സഹിഷ്ണുതയോടെ, ഈ രണ്ട് വിഷയവും സംസാരിക്കാനും കൈകാര്യം ചെയ്യാനും കഴിവുള്ളവര്‍ വളരെ കുറവാണ് നമുക്കിടയില്‍ /ജനങ്ങള്‍ക്കിടയില്‍‍. അവരവര്‍ വിശ്വസിക്കുന്ന/പിന്തുടരുന്ന  മതത്തിന്റേയും രാഷ്ട്രീയത്തിന്റേയും പിഴവുകളെപ്പോലും  പിന്താങ്ങുന്ന തരത്തിലാണ് ബഹുഭൂരിപക്ഷത്തിന്റേയും സംസാരവും പ്രവര്‍ത്തനങ്ങളും. ഈ പ്രവണത ശത്രുത ഉണ്ടാക്കാന്‍ മാത്രമേ ഉപകരിക്കൂ. ഈ 2 വിഷയങ്ങള്‍ സംസാരിക്കാതിരുന്നിട്ടും ആവശ്യത്തിലധികം ശത്രുക്കള്‍ ഇപ്പോള്‍ത്തന്നെ എനിക്കുണ്ട്. ശത്രുത സമ്പാദിക്കാനല്ല ഞാനിവിടെ കിടന്ന് കറങ്ങുന്നത്. അതുകൊണ്ടുതന്നെ കൂടുതല്‍ ശത്രുക്കളെ ഉണ്ടാക്കാതിരിക്കാനായി ഈ വിഷയങ്ങള്‍ സംസാരിക്കാതെ നില്‍ക്കുന്നു എന്ന് മാത്രം.  വിമര്‍ശകരുടെ ഭാഗത്ത് നിന്ന് നോക്കിയാല്‍ ഓടിയൊളിക്കുന്നതായി തന്നെ തോന്നാം. അതിനെ തെറ്റ് പറയാനാവില്ല. ഒരു ഒളിച്ചോട്ടം കൊണ്ട് ബൂലോകത്തും ഭൂലോകത്തും കുറച്ചെങ്കിലും സ്വസ്ഥതയും സമാധാനവും എന്റെ വകയായി സംഭാവന ചെയ്യാനാകുമെങ്കില്‍ ആ ഒളിച്ചോട്ടത്തില്‍ ഞാന്‍ അഭിമാനിക്കുന്നു. 
4. ഭൂലോകത്തിന്റെ ഏതോ കോണിലിരുന്ന രണ്ട് വ്യക്തികളായ നിരക്ഷരനും,സജി അച്ചായനും ബൂലോകയാത്രകളില്‍ ഒന്നിക്കാനുണ്ടായ സാഹചര്യവും, ഒപ്പം നിങ്ങളെ യോജിപ്പിക്കുന്ന കെമിസ്ടിയും എന്താണ്?
ഭൂലോകത്തിന്റെ ഏത് ഭാഗത്ത് ജീവിച്ചാലും,  സമാന മനസ്സുകള്‍ തമ്മില്‍ തിരിച്ചറിയാന്‍ അധികം കാലതാമസം ഉണ്ടായെന്ന് വരില്ല. അച്ചായനെ ഞാന്‍ ആദ്യമായി കാണുന്നത് 2008 ലെ ചെറായി ബ്ലോഗ് മീറ്റില്‍ വെച്ചാണ്. അതിന് മുന്‍പ് അദ്ദേഹവുമായി ഫോണില്‍ ആദ്യമായി സംസാരിക്കുന്നതും ചെറായിലുള്ള മറ്റൊരു ബ്ലോഗ് സുഹൃത്തിന്റെ വീട്ടില്‍ വെച്ച് ആ വ്യക്തിയുടെ ഫോണിലൂടെയാണ്. രസതന്ത്രം അപ്പോള്‍ത്തന്നെ ആരംഭിച്ചുകഴിഞ്ഞിരുന്നു എന്നാണ് എനിക്ക് തോന്നുന്നത്. പിന്നെ ബഹറിനില്‍ വെച്ചും അദ്ദേഹവുമായി പല പ്രാവശ്യം കാണാനിടയായി.  അന്ന് ഒരാഴ്ച്ചയോളം ബഹറിനിലെ ഓരോ മുക്കിലും മൂലയിലും അച്ചായനുമായി കറങ്ങിനടക്കാന്‍ അവസരമുണ്ടായി. പിന്നീട്  നാട്ടില്‍ ‘പെരിയാറിന്റെ ഉത്ഭവം തേടി’ ഒരു വലിയ ട്രെക്കിങ്ങ്  പ്ലാന്‍ ചെയ്തെങ്കിലും, ചില സാങ്കേതിക കാരണങ്ങളാല്‍ അത്  ചെയ്യാനായില്ല. അതിന് പകരമായി മറ്റൊരു വ്യത്യസ്തമായ യാത്ര ചെയ്യണമെന്നുണ്ടായിരുന്നു. ഇക്കഴിഞ്ഞ മാസം ഞങ്ങള്‍ ഒരുമിച്ച് നാട്ടിലെത്തി അങ്ങനൊരു യാത്ര ചെയ്യുകയുണ്ടായി. രസതന്ത്രം നന്നായി വര്‍ക്ക് ഔട്ട് ചെയ്യുന്നുണ്ടെന്നുള്ളതിനേക്കാള്‍ അച്ചായനുമായി യാത്ര ചെയ്യുമ്പോള്‍ മാത്തമാറ്റിക്‍സും എക്കണോമിക്സും നല്ല രീതിയില്‍ തന്നെ പോകുന്നുണ്ടെന്നാണ് എന്റെ അനുഭവം.  ബഹറിനില്‍ കറങ്ങിനടന്നതിന്റെ എല്ലാ ചിലവുകളും അച്ചായനാണ് വഹിച്ചത്. സ്ഥിരമായി അച്ചായനെ ‘വഹിക്കാ‘മല്ലോ എന്ന ദുഷ്‌ചിന്തയും കൂടെ എന്റെ മനസ്സില്‍ ഉണ്ടെന്ന് അദ്ദേഹത്തിന് ഇതുവരെ പിടികിട്ടിയിട്ടില്ലെന്ന് തോന്നുന്നു. 
5. ഒരു വ്യക്തിയെന്ന നിലയില്‍ മാതൃകാപരമാ‍യതും ഒപ്പം സാമൂഹികപ്രതിബദ്ധതയുമുള്ള ഒരു മനുഷ്യനാവാന്‍ നിരക്ഷരന്റെ അച്ഛനും അമ്മയും എത്രത്തോളം ജീവിതത്തില്‍ സ്വാധിനിച്ചിട്ടുണ്ട്?
അച്ഛനും അമ്മയും അദ്ധ്യാപകരായിരുന്നു. അദ്ധ്യാപകര്‍ സാമൂഹ്യപ്രതിബദ്ധത വളരെ കൂടുതലുള്ള അല്ലെങ്കില്‍ വളരെ കൂടുതല്‍ കാണിക്കേണ്ട ഒരു വിഭാഗം  ആള്‍ക്കാരാണ്. തീര്‍ച്ചയായും അവരുടെ ജീവിതരീതികള്‍ തന്നെയാണ് ഞാനും പിന്തുടര്‍ന്നിട്ടുള്ളത്.
6. കുറ്റബോധം കൊണ്ട് സ്വന്തം ഭാര്യയുടെ മാറില്‍ ചാരി കരഞ്ഞ സംഭവങ്ങള്‍ ഉണ്ടോ ? അതുപോലെ സ്വന്തം ഭാര്യയില്‍ അഭിമാനം കൊണ്ട നിമിഷങ്ങള്‍  പറയാമോ?
ഒരുപാടുണ്ടായിട്ടുണ്ട്. അത്തരം സിറ്റ്വേഷനുകള്‍ അവര്‍ കൈകാര്യം ചെയ്യുന്ന രീതി തന്നെ അഭിമാനം കൊള്ളാന്‍ പോന്നതാണ്. എല്ലാം അക്കമിട്ട് പറയണമെങ്കില്‍ ഈ ഇന്റര്‍വ്യൂ 125 കാണ്ഡങ്ങള്‍ എങ്കിലും ആക്കി മാറ്റുന്നതായിരിക്കും അഭികാമ്യം :)
7. നിരക്ഷരന്‍ ഒരു മതവിശ്വാസിയാണോ അതോ ആത്മിയവാദിയാണോ ? വിശദികരിക്കാമോ?
ഞാനങ്ങനെ ‘ഒരു‘ മതത്തില്‍ മാത്രം വിശ്വസിക്കുന്ന ആളല്ല. എല്ലാം മതങ്ങളിലും വിശ്വസിക്കുന്നു. മതങ്ങള്‍ മനുഷ്യന്റെ നന്മയ്ക്ക് ഉതകാതെ സമൂഹത്തിന്റെ നാശത്തിനായി വര്‍ത്തിക്കുന്ന ഒരു തലത്തിലേക്ക് കൂപ്പുകുത്തി, നിലവാരത്തകര്‍ച്ച നേരിടുന്ന ഈ കാലഘട്ടത്തില്‍ എല്ലാ മതങ്ങളിലും ഉള്ള വിശ്വാസം കുറഞ്ഞിട്ടുണ്ടെന്നതാണ് സത്യം.
ആത്മീയത എന്നത് എന്താണെന്ന് ആദ്യം നിരക്ഷരനായ എനിക്ക് പറഞ്ഞ് തരേണ്ടി വരും ആ ചോദ്യത്തിന് ഉത്തരം തരണമെങ്കില്‍. ഒന്നുമാത്രം പറയാം. ഈശ്വരന്‍ എന്ന് എല്ലാവരും പറയുന്ന ഒരു സംഭവമുണ്ടല്ലോ ? അതിനെ ‘പ്രകൃതി‘ എന്ന് മറ്റൊരു പേരിട്ട് ഞാനും വിശ്വസിക്കുന്നുണ്ട്.  മഴ എങ്ങനെ പെയ്യുന്നു? ഇടിവെട്ടുന്നത് എങ്ങനെ ? ഋതുക്കള്‍ മാറി വരുന്നത് എങ്ങനെ ? കാറ്റടിക്കുന്നത് എങ്ങനെ ? ഭൂകമ്പകളും, സുനാമികളും ഉണ്ടാകുന്നത് എങ്ങനെ ? ബിഗ് ബാങ്ങ് ഉണ്ടായത് എങ്ങനെ ? ഇപ്പറഞ്ഞ എല്ലാ കാര്യങ്ങള്‍ക്കും ശാസ്ത്രീയമായ വിശദീകരണം നമുക്കുണ്ട്. ഈ ഭൂമിക്കും അതുള്‍ക്കൊള്ളുന്ന സൌരയൂധത്തിനും അപ്പുറം പിന്നേയും അനേകമനേകം കാര്യങ്ങള്‍ നമ്മള്‍ക്കറിയാം. ഇതിന്റെയൊക്കെ ശാസ്ത്രീയവശങ്ങള്‍ / വിശദീകരണങ്ങള്‍ നിലനില്‍ക്കുകയും അംഗീകരിക്കുകയും ചെയ്യുമ്പോള്‍ത്തന്നെ ഇതിന്റെയെല്ലാം നിയന്ത്രണം പ്രകൃതിയിലാണെന്നാണ് എന്റെ കാഴ്ച്ചപ്പാട്. ദൈവത്തിന്റെ, നേരിട്ട് കാണാനാവുന്ന ഓരോരോ നീക്കങ്ങളാണ് കാറ്റും മഴയും വെയിലും വസന്തവും സുനാമിയും ഉരുള്‍പൊട്ടലും ഇടിമിന്നലുമൊക്കെ. ഏതോ ഒരു സൂപ്പര്‍ പവര്‍ ഇതൊക്കെയും നിയന്ത്രിക്കുന്നുണ്ട്. ആ പവറിനെ ദൈവമെന്ന് /പ്രകൃതിയെന്ന് വിശ്വസിക്കാനാണ് എനിക്കിഷ്ടം. ഒരു മരം വെട്ടുമ്പോളോ ഒരു മല ഇടിക്കപ്പെടുമ്പോഴോ വിലപിക്കാത്തവന് ഏതെങ്കിലും ഒരു ആരാധനാലയം തകര്‍ക്കപ്പെടുമ്പോള്‍ വികാരം കൊള്ളാന്‍ അവകാശമില്ലെന്ന് ഞാന്‍ പറയും.  എന്റെ മതവിശ്വാസവും ആത്മീയതയും ഇപ്പറഞ്ഞ വരികളില്‍ എവിടെയെങ്കിലും ഒളിഞ്ഞിരുപ്പുണ്ടെങ്കില്‍ താങ്കള്‍ക്കത് വ്യാഖ്യാനിച്ചെടുക്കാം. ഇതില്‍ക്കൂടുതല്‍ വിശദീകരിക്കാനുള്ള അക്ഷരാഭ്യാസം എനിക്കില്ല. 
8. ബ്ലോഗിംഗ് ജീവിതത്തില്‍ കൊണ്ടുവന്നുതന്ന അനേകായിരം സൌഹൃദത്തെ എങ്ങിനെ വിലയിരുത്തുന്നു?
ഒരു സ്വപ്നം പോലെ മനോഹരമാണത്. സ്കൂള്‍,  കോളേജ് , ജോലി തലങ്ങളില്‍ നിന്നെല്ലാം കിട്ടിയിട്ടുള്ള സൌഹൃദങ്ങള്‍ പലതും ആ കാലഘട്ടങ്ങള്‍ കഴിയുന്നതോടെ കുറഞ്ഞ് വരുകയും പലതും നഷ്ടപ്പെടുകയുമാണ് ഉണ്ടാകുന്നത്. ബ്ലോഗിങ്ങില്‍ / ഇന്റര്‍നെറ്റില്‍ നിന്ന് കിട്ടിയിട്ടുള്ള പല സുഹൃത്തുക്കളേയും നേരില്‍ കണ്ടിട്ടുപോലുമില്ല. എന്നിരുന്നാലും ലോകത്തിന്റെ ഏതെങ്കിലും ഒരു കോണില്‍ കഴിയുന്ന ഇവരെയൊക്കെ എന്നെങ്കിലും നേരില്‍ കാണാമെന്നുള്ള പ്രതീക്ഷയ്ക്ക് ഒരു മധുരസ്വപ്നത്തിന്റെ സുഖമുണ്ട്. ചില രാജ്യങ്ങളില്‍ / സ്ഥലങ്ങളില്‍ യാത്ര പോകേണ്ടി വന്നപ്പോള്‍ അവിടെയൊക്കെയുള്ള ഇതുവരെ കാണാത്ത സുഹൃത്തുക്കള്‍, എല്ലാ സൌകര്യങ്ങളും ഒരുക്കിത്തന്ന് കൂടെ നിന്നതുപോലുള്ള അനുഭവങ്ങള്‍ വളരെ ഹൃദ്യമാണ്, മനസ്സില്‍ തട്ടുന്നതാണ്. എത്രയോ രാജ്യങ്ങളിലേക്ക് ഇവരില്‍ പലരില്‍ നിന്നും യാത്രാക്ഷണം കിട്ടിയിരിക്കുന്നു! ബ്ലോഗിങ്ങ് ജീവിതം തുടങ്ങിയില്ലായിരുന്നെങ്കില്‍ നഷ്ടപ്പെടുമായിരുന്ന അനുഭവങ്ങളാണ് അതൊക്കെ. ഈ സൌഹൃദങ്ങളുടെയൊക്കെ ഊഷ്മളത അനിര്‍വ്വചനീയമാണ്.  
9. മനോജ് രവീന്ദ്രന്‍ എന്ന വ്യക്തി, നിരക്ഷരന്‍ എന്ന ബ്ലോഗറെ എങ്ങിനെ നോക്കിക്കാണുന്നു? മനോജ് രവീന്ദ്രനില്ലാതത എന്തൊക്കെ ഗുണങ്ങാളാണ് നിരക്ഷരനുള്ളത്.?
മനോജ് രവീന്ദ്രന്‍ എന്ന വ്യക്തി ക്ഷിപ്രകോപിയാണ്, അല്‍പ്പനാണ്, അസൂയാലുവാണ്, അഹങ്കാരിയാണ്. അയാള്‍ക്ക് വിദ്യാഭ്യാസമുണ്ടായിരിക്കാം. പക്ഷെ ഒരു മനുഷ്യനുണ്ടാകേണ്ട മറ്റ് പല നല്ല ഗുണങ്ങളും അയാള്‍ക്കില്ല. അക്ഷരാഭ്യാസമില്ലെങ്കിലും നിരക്ഷരന് അയാളുടെ കോപം മനോജ് രവീന്ദ്രനേക്കാള്‍ നന്നായി നിയന്ത്രിക്കാനാകുന്നുണ്ട്.
ഉദാഹരണത്തിന്റെ ഒരു ബ്ലോഗ് പോസ്റ്റില്‍ കമന്റിടുന്ന കാര്യമെടുക്കാം. മനോജ് രവീന്ദ്രന്‍ എന്നയാള്‍ ബ്ലോഗ് ലോകത്തിന് വെളിയിലാണല്ലോ ? മേല്‍പ്പറഞ്ഞ ബ്ലോഗ് പോസ്റ്റ്, ബ്ലോഗനയില്‍ വന്നെന്ന് കരുതുക. അത് എഴുതിയ ആള്‍ മനോജ് രവീന്ദ്രന്റെ മുന്നില്‍ ഇരിക്കുന്നെന്നും മനോജ് രവീന്ദ്രനെ ആ പോസ്റ്റ് പ്രകോപിപ്പിച്ചെന്നും കരുതുക.  ഉള്ളില്‍ തോന്നിയ കാര്യങ്ങള്‍ വളരെ പെട്ടെന്ന് തന്നെ ഒരു നിയന്ത്രണവുമില്ലാതെ എഴുത്തുകാരന്റെ മുഖത്തടിച്ചതുപോലെ വിളിച്ച് പറഞ്ഞ് അദ്ദേഹത്തേയും പ്രകോപിപ്പിച്ചെന്ന് വരും, മനോജ് രവീന്ദ്രന്‍ എന്ന വ്യക്തി.   
ഇതേ പോസ്റ്റ് ബ്ലോഗില്‍ ഓണ്‍ലൈന്‍ ആയി വായിച്ച് ഇതേ വികാരത്തോടെ ഒരു കമന്റ് പോസ്റ്റ് ചെയ്യാന്‍ നിരക്ഷരനാകില്ല. അങ്ങനൊരു കമന്റ് എഴുതി വരുമ്പോഴേക്കും നിരക്ഷരന്‍ എന്ന ബ്ലോഗര്‍ മനസ്സിലാക്കിയിരിക്കും അത് പബ്ലിഷ് ചെയ്യാന്‍ പാടില്ലാത്തതാണെന്ന്. ചുരുക്കിപ്പറഞ്ഞാല്‍ ഓണ്‍ലൈനും, നേര്‍ക്ക് നേരും തമ്മിലുള്ള എല്ലാ വ്യത്യാസങ്ങളും മനോജ് രവീന്ദ്രനും, നിരക്ഷരനും തമ്മില്‍ കണ്ടെന്ന് വരാം.
10. ബ്ലോഗില്‍ നിരക്ഷരന്‍ പുലര്‍ത്തുന്ന സ്ത്രീസൌഹൃദത്തെ ഭാര്യ എങ്ങിനെ നോക്കിക്കാണുന്നു. സ്വകാര്യതകള്‍ ബ്ലോഗ് അപഹരിക്കുന്നുവെന്ന് ഭാര്യയ്ക്ക് തോന്നിയിട്ടുണ്ടോ?
ബ്ലോഗില്‍ നിന്നുള്ള വളരെ അടുത്ത സ്ത്രീ സുഹൃത്തുക്കളെയൊക്കെ ഭാര്യയ്ക്കറിയാം. അതില്‍ പലരും ഇതിനകം അവരുടേയും സുഹൃത്തുക്കളായി മാറിയിട്ടുമുണ്ട്. മറ്റ് സ്ത്രീ സുഹൃത്തുക്കളെ എന്തെങ്കിലും ആവശ്യം വരുന്ന സമയത്ത് അപ്പപ്പോള്‍ പരിചയപ്പെടുത്താറുണ്ട്. ഇവരെയൊക്കെ എന്റെ ഭാര്യ എങ്ങനെ നോക്കിക്കാണുന്നു എന്ന ചോദ്യത്തിന് ... ഞാന്‍ തന്നെ ഇവരില്‍ പലരേയും കണ്ടിട്ടില്ല. പിന്നെങ്ങിനാ എന്റെ ഭാര്യ നോക്കിക്കാണുന്നത് ? :) :)
സ്വകാര്യത അപഹരിച്ചെന്ന് തോന്നുന്നില്ല, പക്ഷെ അവര്‍ക്കായി കൊടുക്കേണ്ട സമയം കൂടെ ബ്ലോഗ് അപഹരിച്ചെന്ന് പരാതിയുണ്ട്. ഒഴിവുദിവസങ്ങള്‍ തള്ളിനീക്കാനായിട്ടാണ് ബ്ലോഗിങ്ങ് തുടങ്ങിയത് തന്നെ. അതിപ്പോള്‍ ഒഴിവില്ലാത്ത സമയത്തേക്ക് കൂടെ കടന്നിട്ടുണ്ടെന്ന പരാതി കഴമ്പുള്ളതാണ്. നിവൃത്തിയില്ലാത്തതുകൊണ്ട് സഹിച്ചുപോകുന്നതാകാനേ തരമുള്ളൂ :)
11. നിരക്ഷരന്‍ ഇഷ്ടപ്പെടുന്ന കേരളത്തിലെ രാഷ്ടീയ നേതാക്കള്‍ ആരൊക്കെ, അതിനുള്ള കാരണങ്ങള്‍?
മണ്‍മറഞ്ഞ് പോയവരില്‍ എ.കെ.ജി.  സ്വയം സഹകരിച്ച് നല്ല നിലയില്‍  എന്ന ഒരു സ്ഥാപനം (കോഫി ഹൌസ്) നടത്തി കുറേയേറേ അണികള്‍ക്ക് / ജനങ്ങള്‍ക്ക് ജീവിതമാര്‍ഗ്ഗം ഉണ്ടാക്കാന്‍ സഹായിച്ചതുകൊണ്ടും കോഫി ഹൌസിലെ മസാല ദോശയും കോള്‍ഡ് കോഫിയും ഇഷ്ടമായതുകൊണ്ടാണ് എ.കെ.ജി.യോട്  ഈ ഇഷ്ടം. അതുപോലെ മറ്റേതെങ്കിലും രാഷ്ട്രീയ നേതാവ് തന്റെ പാര്‍ട്ടി പ്രവര്‍ത്തകര്‍ക്കായി ഒരു സ്ഥാപനം ഉണ്ടാക്കിയിട്ടുണ്ടോ ആവോ ? (ഞാന്‍ നിരക്ഷരനാണെന്ന് അറിയാമല്ലോ ?) മണ്‍‌മറഞ്ഞ് പോയവരില്‍ മറ്റൊരു വ്യക്തി ഇ.കെ. നായനാരാണ്. കൊച്ചുകുട്ടികളെപ്പോലെയുള്ള  പെരുമാറ്റവും സംസാരവും അതിലെ നര്‍മ്മവുമാണ് അദ്ദേഹത്തോട് ഇഷ്ടം തോന്നിക്കുന്നത്. നേരിട്ട് എനിക്ക് സഹായങ്ങള്‍ തന്നിട്ടുള്ള എല്ലാ രാഷ്ട്രീയക്കാരേയും എനിക്കിഷ്ടം തന്നെയാണ്. മുല്ലപ്പള്ളി രാമചന്ദ്രനും, ഒരു ബ്ലോഗര്‍ കൂടെയായ ലതികാ സുഭാഷും, അവരുടെ ഭര്‍ത്താവ് കെ.ആര്‍. സുഭാഷുമൊക്കെ അക്കൂട്ടത്തില്‍ പെടും.
12. ‘സേവ് മുല്ലപ്പെരിയാര്‍ ഡാം” എന്ന പ്രഖ്യാപിതലക്ഷ്യത്തോടെ പ്രവര്‍ത്തിക്കുന്ന നിരക്ഷരനും സംഘവും, ആ മൂവ്മെന്റിന്റെ ഇന്നത്തെ അവസ്ഥയൊന്ന് വിവരിക്കാമോ?
‘സേവ് മുല്ലപ്പെരിയാര്‍ ഡാം‘ അല്ല,  ‘സേവ് കേരള‘യാണ് ശരി. മുല്ലപ്പെരിയാര്‍ ഡാമിന്റെ കാലാവധി കഴിഞ്ഞു. അതിനെ രക്ഷപ്പെടുത്താന്‍ ഇനി ആര്‍ക്കുമാവില്ല. നിരക്ഷരനും കൂട്ടരും അങ്ങനെ പ്രത്യേകിച്ചൊരു ലക്ഷ്യങ്ങളൊന്നും പ്രഖ്യാപിച്ചിട്ടില്ല. ഡാം പൊട്ടിവരുന്ന മലവെള്ളപ്പാച്ചിലില്‍ കുറേനേരം ഒഴുകി നടക്കുകയോ, പിന്നീട്  വെള്ളം കുടിച്ച് ചത്ത് മലക്കുകയോ, നേരിട്ട് അറബിക്കടലില്‍ ലയിക്കുകയോ ചെയ്യുന്നതിനിടയില്‍ കിട്ടുന്ന അവസാന നിമിഷങ്ങളില്‍ ഈ വെള്ളം എവിടന്ന് വന്നു? എങ്ങനെ വന്നു എന്നാലോചിച്ച് സമ്പൂര്‍ണ്ണ സാക്ഷരരായ മലയാളികള്‍ തലപുണ്ണാക്കാന്‍ ഇടവരരുത് എന്ന ഒറ്റ ആഗ്രഹമേ ഇപ്പോള്‍ ഉള്ളൂ. അതിനായി മുല്ലപ്പെരിയാര്‍ ഡാമിനെപ്പറ്റി കിട്ടാവുന്ന അത്രയും പത്രക്കുറിപ്പുകള്‍ ഒരു ബ്ലോഗില്‍ പോസ്റ്റ് ചെയ്യുന്ന എന്നതൊഴിച്ചാല്‍ മറ്റൊന്നും ചെയ്യുന്നുമില്ല.
ഇതില്‍ക്കൂടുതലൊക്കെ ചെയ്യാന്‍ കഴിയും. പക്ഷെ ഒരാള്‍ക്ക് ഒറ്റയ്ക്ക് സാധിക്കില്ല. ഇടുക്കിയില്‍ ചപ്പാത്ത് എന്ന ഗ്രാമത്തില്‍ ഒരിക്കല്‍ ഞങ്ങള്‍ പോയിരുന്നു. ഡാം പൊട്ടിയാല്‍ ആദ്യം വെള്ളത്തിനടിയിലാകുന്ന ഗ്രാമങ്ങളില്‍ ഒന്നാണത്. അവിടെ ഒരു വര്‍ഷത്തിലധികമായി നടത്തിവരുന്ന ഒരു സമരപ്പന്തലുണ്ട്. ആ സമരത്തിന്റെ നേതാക്കളെ നേരില്‍ക്കണ്ടപ്പോള്‍ അവരുടെ കൈവശം ഉള്ള എല്ലാ രേഖകളും ബ്ലോഗില്‍ പോസ്റ്റ് ചെയ്യാനായി തരാമെന്ന് പറഞ്ഞു. പത്രക്കുറിപ്പുകളാണ് അധികവും. അതെല്ലാം സ്ക്കാന്‍ ചെയ്ത് എടുക്കാനുള്ള ചിലവിനുള്ള പണം വരെ കൊടുത്തിട്ടാണ് ഞങ്ങളവിടന്ന് പോന്നത്. ഒരു വര്‍ഷത്തിലധികം കഴിഞ്ഞിട്ടും അതൊന്നും ഞങ്ങള്‍ക്ക് കിട്ടിയില്ല. അതൊക്കെ കിട്ടിയാലും ഡാം പൊട്ടില്ല എന്ന് ഉറപ്പൊന്നുമില്ലല്ലോ ?  പക്ഷെ, ചരിത്രരേഖകള്‍ ആകാന്‍ പോന്ന രേഖകളാണത്. ഡാം പൊട്ടി കേരളം തന്നെ ഇല്ലാതായാലും ഇന്റര്‍നെറ്റ് ഒലിച്ച് പോകില്ലല്ലോ ? ഈ ബ്ലോഗും അവിടെ കിടക്കുന്ന രേഖകളും കാലത്തിനപ്പുറത്തേക്ക് കടന്ന് ചെന്നെന്നിരിക്കും. ചപ്പാത്തില്‍ ഉള്ളവര്‍ക്ക് ഒരു തരം നിസ്സംഗതയാണിപ്പോള്‍ എന്നുവേണം മനസ്സിലാക്കാന്‍.
കേരളത്തിലുള്ള മാദ്ധ്യമങ്ങള്‍ അടക്കമുള്ള മറ്റ് ജനങ്ങള്‍ക്കാകട്ടെ മുല്ലപ്പെരിയാര്‍ ഇഷ്യൂ എന്താണെന്ന് പോലും ശരിക്കും അറിയില്ല. മാദ്ധ്യമങ്ങള്‍ പറയുന്നതൊക്കെ കേട്ടിരിക്കാന്‍ ബഹുരസമാണ്. 99 കൊല്ലം, 999 മാസം എന്നൊക്കെയാണ് പല പ്രിന്റ് / ദൃശ്യമാദ്ധ്യമങ്ങളിലും കേള്‍ക്കുന്നതും കാണുന്നതും. 999 കൊല്ലത്തേക്കാണ് മുല്ലപ്പെരിയാര്‍ കരാറിന്റെ കാലാവധിയെന്ന് പോലും പല മാദ്ധ്യമപ്രവര്‍ത്തകര്‍ക്കും അറിയില്ല. അവരാണല്ലോ ജനങ്ങളിലേക്ക് ഈ വിവരമൊക്കെ എത്തിക്കേണ്ടത് ?!
കുറെ മുന്‍പ് ഒരു വിശിഷ്ട വ്യക്തിയെ നേരില്‍ കണ്ട്  ‘സേവ് കേരള’ ബ്ലോഗില്‍ ഇടാനായി മുല്ലപ്പെരിയാര്‍ വിഷയത്തില്‍ ഒരു ആര്‍ട്ടിക്കിള്‍ എഴുതി തരാനാകുമോ എന്ന് അന്വേഷിച്ചു. സ്വന്തമായി 3ല്‍ അധികം പുസ്തകമൊക്കെ പബ്ലിഷ് ചെയ്തിട്ടുള്ള ഒരു മുന്‍ കോളേജ് അദ്ധ്യാപകന്‍ കൂടെയാണ് അദ്ദേഹം. എന്നിട്ടും, എന്താണ് മുല്ലപ്പെരിയാര്‍ വിഷയമെന്ന്, എനിക്കറിയുന്നപോലെ വള്ളിപുള്ളി വിടാതെ അദ്ദേഹത്തിന് പറഞ്ഞ് കൊടുക്കേണ്ടി വന്നു. അദ്ദേഹത്തിന് ഈ വിഷയത്തെപ്പറ്റി ഒന്നും അറിയില്ലെന്ന് തുറന്ന് പറഞ്ഞു. ഇപ്പറഞ്ഞതില്‍ നിന്ന് കേരളത്തിലെ സാധാരണക്കാരില്‍ സാധാരണക്കാരായ ജനങ്ങളുടെ കാര്യം ഊഹിക്കാവുന്നതാണല്ലോ ? കരാര്‍ തീരാന്‍ ഇനിയും 800 കൊല്ലത്തിലധികം സമയമുണ്ട്. പറ്റുമെങ്കില്‍ ഇതൊരു പാഠ്യവിഷയമാക്കാന്‍ സര്‍ക്കാര്‍ ശ്രമിക്കട്ടെ. നിരക്ഷരനും കൂട്ടരും ചെയ്യുന്നതൊക്കെ ജലരേഖകളാണെന്ന് മനസ്സിലാക്കിക്കൊണ്ട് തന്നെ സ്വന്തം സംതൃപ്തിക്കായി മാത്രമാണിപ്പോള്‍ ഇതൊക്കെ ചെയ്തുപോകുന്നത്.
13.  നിരക്ഷരന്‍ ഒത്തിരി യാത്രകള്‍ ചെയ്യുകയും, നാനാമതസ്ഥരായ ഒത്തിരി കൂട്ടുകാര്‍ ഉള്ള വ്യക്തിയുമാണെന്നറിയാം, അതിനാല്‍ തന്നെ സമൂഹത്തില്‍ ആരോപിക്കപ്പെടുന്ന രോഗാതുരമായ വര്‍ഗീയ ചേരിതിരുവുകള്‍ എത്രത്തോളം സത്യമെന്ന് വിശ്വസിക്കുന്നു?
വര്‍ഗ്ഗീയമായ ചേരിതിരിവുകള്‍ എല്ലാക്കാലത്തും ഉണ്ടായിട്ടുണ്ട്. പക്ഷെ ഇക്കാലത്ത് അത് വളരെ വളരെക്കൂടുതലാണ്. അത് സത്യമല്ലെന്ന് വിശ്വസിക്കാതിരിക്കാന്‍ ഒരു തെളിവുകളും ഇല്ലെന്ന് മാത്രമല്ല, സത്യമാണെന്നുള്ളത് തളര്‍ന്ന് വീല്‍ചെയറില്‍ ഇരിക്കുന്ന ഒരാള്‍ക്ക് പോലും മനസ്സിലാക്കാന്‍ പറ്റുന്ന അവസ്ഥയാണുള്ളത്. അതിനായി അത്രയധികം യാത്ര ചെയ്ത് ബസ്സ് കാശ് കളയണമെന്നൊന്നും ഇല്ല.
14. മദ്യപാനമെന്ന ദു:ശീലത്തെ എങ്ങിനെ കാണുന്നു?
മദ്യപാനം എന്നത് ഒരു ശീലം എന്നേ എന്റെ കാര്യത്തിലാണെങ്കില്‍ ഞാന്‍ പറയൂ. അതിനെ ദുശ്ശീലമെന്ന് പറയണമെങ്കില്‍ ഒരാള്‍ എങ്ങനെ മദ്യപിക്കുന്നു ? എന്തിന് മദ്യപിക്കുന്നു എന്നതൊക്കെ കണക്കിലെടുക്കണം.  ഒരു ഉദാഹരണം പറയാം. പല പാശ്ചാത്യരാജ്യങ്ങളിലും അവിടത്തെ കൊടിയ തണുപ്പുകാരണം ശരീരത്തിന്റെ ചൂട് ചിലനിര്‍ത്താനായി മദ്യം ഉപയോഗിക്കാറുണ്ട്. അതില്‍ നിന്ന് കാര്യമായ ലഹരിയൊന്നും കിട്ടില്ല. ശരീരോഷ്മാവ് അല്‍പ്പം വര്‍ദ്ധിപ്പിക്കാന്‍ ഒരു മാര്‍ഗ്ഗം, അത്രതന്നെ. ആ രാജ്യങ്ങളിലൊക്കെ അല്‍പ്പസ്വല്‍പ്പം മദ്യപിച്ച് വാഹനങ്ങളും ഓടിക്കാം. രക്തത്തിലെ മദ്യത്തിന്റെ തോത് ക്ലിപ്തപ്പെടുത്തിയിട്ടുണ്ടെന്ന് മാത്രം. (മദ്യത്തിന്റെ തോത് നമ്മുടെ നാട്ടിലും ബാധകമാണെന്ന് തോന്നുന്നു. ഉറപ്പില്ല.) 
ഞാന്‍ വളരെ ശാസ്ത്രീയമായ രീതിയില്‍ മദ്യപിക്കുന്ന ആളാണ്. ഭക്ഷണം കഴിഞ്ഞതിന് ശേഷം മദ്യത്തിന്റെ രുചി ആസ്വദിച്ച്, അതിന്റെ തരിപ്പ് അറിഞ്ഞ് സ്വബോധം നഷ്ടപ്പെടാത്ത വിധത്തില്‍ 1 അല്ലെങ്കില്‍ 2 പെഗ്ഗ് മാത്രമേ കഴിക്കാറുള്ളൂ. മാസത്തില്‍ 3 അല്ലെങ്കില്‍ 4 പ്രാവശ്യമാണ് മദ്യപിക്കാറ്. ചിലപ്പോള്‍ മാസങ്ങളോളം മദ്യപിക്കാറില്ല. ഇസ്ലാമിക് രാജ്യങ്ങളില്‍ പോയാല്‍ മദ്യപിക്കാറില്ല. മദ്യപിച്ച് ഡ്രൈവ് ചെയ്യാറില്ല. മദ്യപാനത്തെ ഒരിക്കലും പ്രോത്സാഹിപ്പിച്ചിട്ടില്ല, മദ്യപിക്കാത്തവര്‍ക്ക് മദ്യപാനികള്‍ക്ക് കൊടുക്കുന്നതിനേക്കാള്‍ ബഹുമാനം കൊടുക്കാറുമുണ്ട്.
മദ്യം ഇല്ലാതെ ഒരു നേരം അല്ലെങ്കില്‍ ഒരു ദിവസം പിടിച്ച് നില്‍ക്കാനാവില്ല, ഒരു കുപ്പി പൊട്ടിച്ചാല്‍ അന്നുതന്നെ അത് മുഴുവനും കുടിച്ച് തീര്‍ത്തേ പറ്റൂ എന്ന അവസ്ഥ ഒരാള്‍ക്ക് വരുന്ന നിമിഷം തുടങ്ങി മദ്യപാനം ഒരു ദു:ശ്ശീലമായെന്ന് ഞാന്‍ പറയും.  ഭൂരിഭാഗം മലയാളികളുടേയും മദ്യപാനശീലങ്ങള്‍ ദുശ്ശീലങ്ങള്‍ തന്നെയാണ്. മദ്യത്തിന്റെ രുചി അറിയാനോ അത് ആസ്വദിക്കാനോ അല്ല പലരും മദ്യപിക്കുന്നത്. ഞരമ്പുകള്‍ ഒക്കെ ഒന്ന് അയഞ്ഞ് കഴിയുമ്പോള്‍ ആരെയെങ്കിലും നാല് തെറിവിളിക്കാനും, അത്താഴപ്പട്ടിണിക്കാരായ ഭാര്യയുടെയും മക്കളുടേയും കൂമ്പിടിച്ച് വാട്ടാനുമായുള്ള മദ്യപാനം അപലപനീയമാണ്. 
മദ്യമേഖലയില്‍ ജോലി ചെയ്യുന്ന അത്രയും പേരെ പുനരധിവസിപ്പിച്ച് ഇന്ത്യയൊട്ടാകെ മദ്യം നിരോധിക്കാമെങ്കില്‍, കുറഞ്ഞ പക്ഷം കേരളത്തിലെങ്കിലും ഇപ്രകാരം സമ്പൂര്‍ണ്ണ മദ്യനിരോധനം നടത്താനാകുമെങ്കില്‍ എന്റെ മദ്യപാനശീലം ഈ നിമിഷം ഉപേക്ഷിക്കാനും മദ്യനിരോധനത്തിനായി കീ ജെയ് വിളിക്കാനും എനിക്കാവും, ഞാനുണ്ടാകും.
15. സ്ത്രീകളിലെ ഏത് ക്വാളിറ്റിയാണ് നിരക്ഷരന്‍ ഏറ്റവും ഇഷ്ടപ്പെടുന്നത്, അതുപോലെ ഏത് സ്വഭാവമാണ് ഏറ്റവും വെറുക്കുന്നത്?
നല്ല ക്വാളിറ്റി....... പിന്‍ബുദ്ധി തന്നെ. മോശം കാര്യമായിട്ടാണ് പെണ്‍ബുദ്ധി പിന്‍‌ബുദ്ധി എന്ന് പറയാറുള്ളതെങ്കിലും എനിക്കത് ഒരു പോസ്റ്റിറ്റീവായ കാര്യമായിട്ടാണ് തോന്നിയിട്ടുള്ളത്. ഒരു കാര്യത്തെപ്പറ്റി ചിന്തിക്കുമ്പോള്‍ എല്ലാ വശങ്ങളും ചിന്തിക്കണമല്ലോ ? അങ്ങനെ നോക്കിയാല്‍ പിന്‍‌ബുദ്ധിയും പ്രയോജനപ്പെടും / ഉപകാരപ്രദമാണ്.  
വെറുക്കുന്ന സ്വഭാവം......... അണിഞ്ഞൊരുങ്ങാന്‍ കൂടുതല്‍ സമയം എടുക്കുന്നത് കാരണം നിശ്ചയിച്ച സമയത്ത് വീട്ടില്‍ നിന്ന് പുറത്തിറങ്ങി ഒരു വഴിക്ക് പോകാന്‍ പറ്റാതെ വരുന്നത്. സ്ത്രീകളില്‍ പലരും ഇക്കാര്യത്തിന് കൂടുതല്‍ സമയം എടുക്കുന്നതുകൊണ്ട് ഇങ്ങനൊരു അവസ്ഥാവിശേഷം പലപ്പോഴും ഉണ്ടായെന്ന് വരും. രാവിലെ 9 മണിക്ക് പോകണമെന്ന് തീരുമാനിച്ചാല്‍ അതിനനുസരിച്ച് നേരത്തേ തന്നെ അണിഞ്ഞൊരുങ്ങുന്നതിന് എനിക്കെതിര്‍പ്പില്ല.
16. മനോജ് രവീന്ദ്രന്‍ വളരെ മൃദുലഹൃദയനാണെന്ന് ഞാന്‍ പറഞ്ഞാല്‍ അത് സമ്മതിച്ചുതരുമോ?
സമ്മതിച്ച് തരില്ല. ഇതിനുത്തരം ചോദ്യം 9ന്റെ ഉത്തരമായി പറഞ്ഞുകഴിഞ്ഞു.
17. ചില മാതാപിതാക്കള്‍ ഒരു കുട്ടി മാത്രമുള്ള ജീവിതം നയിക്കുന്നു. നിരക്ഷരനും അങ്ങിനെ തന്നെ. ഇതിന്റെ ന്യായീകരണമെന്താണ്?
കുട്ടികള്‍ എന്റെ മുന്നില്‍ എന്റെ നോട്ടമെത്തുന്നിടത്ത് വളരണം ഓരോ ദിവസവും എന്ന് ആഗ്രഹിക്കുന്ന ആളാണ് ഞാന്‍. എന്റെ ജോലിയുടെ സ്വഭാവം വെച്ച് അത് നടത്താന്‍ എളുപ്പമല്ല. അത് മാത്രമാണ് ഒരു കുട്ടിയുള്ള ജീവിതം നയിക്കുന്നതിന്റെ കാരണം.
18. സൌദി അറേബ്യയില്‍ കുറച്ച് ദിവസം ഉണ്ടായിരുന്നല്ലോ; ആ കാലയളവിനെക്കുറിച്ച് എന്തു പറയുന്നു. സൌദിയെക്കുറിച്ചുള്ള സത്യവും മിഥ്യയും  തിരിച്ചറിയാന്‍ കഴിഞ്ഞോ?
സൌദി എന്നാല്‍ ജയില്‍ എന്ന് പറഞ്ഞ് കേട്ടത് സത്യമാണെന്ന് മനസ്സിലാക്കിയ ദിവസങ്ങള്‍ തന്നെയായിരുന്നു അത്. ജയില്‍ കിടക്കാതെ, ജയിലില്‍ കിടന്നതുപോലെയുള്ള അനുഭവം ഉണ്ടായ ദിവസങ്ങളാണ് അത്.
ഇത് വായിക്കുന്ന, സൌദിയില്‍ സ്ഥിരമായി ജീവിക്കുന്ന സുഹൃത്തുക്കള്‍ എന്നോട് വിയോജിച്ചെന്ന് വരാം. ഒരു സ്ഥലത്ത് കുറേക്കാലം ജീവിക്കുമ്പോള്‍ നമ്മള്‍ അവിടത്തെ കാര്യങ്ങളുമായി പൊരുത്തപ്പെടുന്നത് കൊണ്ട് മാത്രം തോന്നന്നതാണ് അത്. പക്ഷെ ഒരു കാര്യം ഞാന്‍ പറയട്ടെ. എമിഗ്രേഷന്‍ സ്റ്റാമ്പ് പാസ്സ്പോര്‍ട്ടില്‍ അടിച്ച് ഒരു രാജ്യത്ത്  കാല് കുത്തിയതിന് ശേഷം ആ രാജ്യത്തെ നിയമ വ്യവസ്ഥിതിക്ക് അനുസരിച്ച് ജീവിക്കാന്‍ ഓരോ വ്യക്തിയും ബാദ്ധ്യസ്ഥനാണ്. പക്ഷെ എമിഗ്രേഷന്‍ സ്റ്റാമ്പ് അടിക്കാന്‍ മണിക്കൂറുകളോളം ഒരു അഭയാര്‍ത്ഥിയെപ്പോലെ ക്യൂ നില്‍ക്കണമെന്ന് വെച്ചാല്‍, അത് ശുദ്ധ തെമ്മാടിത്തരമാണ്. ആവറേജ് 3 മണിക്കൂറെങ്കിലും ക്യൂ നില്‍ക്കാതെ സൌദിയിലെ മിക്ക എയര്‍പ്പോര്‍ട്ടുകളിലും പാസ്സ്പ്പോര്‍ട്ടില്‍ സ്റ്റാമ്പ് അടിച്ച് കിട്ടില്ല. വെള്ളക്കാരനാണെങ്കില്‍ ക്യൂവില്‍ നിന്ന് മുന്നിലേക്ക് വിളിച്ച് വരുത്ത് സെക്കന്റുകള്‍ക്കകം സ്റ്റാമ്പ് അടിച്ച് കൊടുക്കുകയും ചെയ്യും. ഒരു തരത്തിലും ആര്‍ക്കും ന്യായീകരിക്കാന്‍ പറ്റുന്ന കാര്യങ്ങളല്ല ഇത്. എമിഗ്രേഷന്‍ ക്യൂവില്‍ നില്‍ക്കുന്ന ഓരോ നിമിഷവും ഒരു കുറ്റവാളിയുടെയോ അഭയാര്‍ത്ഥിയുടേയോ മാനസ്സികാവസ്ഥവായിരുന്നു എനിക്ക്. സൌദിയില്‍ സ്ഥിരമായി ജീവിക്കുന്നവര്‍ ഈ കടമ്പ ഒഴിവാക്കാനായി ബഹറിനില്‍ വിമാനമിറങ്ങി റോഡ് മാര്‍ഗ്ഗം സൌദിയിലേക്ക് പോകുന്നത് പതിവാണ്. ഇങ്ങനെ പോയാല്‍ 30  മിനിറ്റ് കൊണ്ട് എല്ലാ ചടങ്ങുകളും തീര്‍ത്ത് രാജ്യത്തിനകത്ത് കടക്കാനാവും.
സൌദി ജീവിതത്തെപ്പറ്റി കൂടുതല്‍ വിശദമാക്കാന്‍ ഞാന്‍ ഉദ്ദേശിക്കുന്നില്ല. കാരണം എനിക്കിനിയും ആ രാജ്യത്ത് വരേണ്ടി വന്നാല്‍ ഈ പറയുന്നതൊക്കെ എന്നെ മോശമായി ബാധിക്കാതെ നോക്കണമല്ലോ ?
19. പുതിയ സംരംഭങ്ങള്‍, പുതിയ കൂട്ടായ്മകള്‍ എന്തെല്ലാം.
എണ്ണപ്പാടത്തെ ജോലിയില്‍ നിന്ന് റിട്ടയര്‍ ചെയ്യാന്‍ ഉദ്ദേശിക്കുന്നു. ഒരു പെന്‍ഷന്‍ പദ്ധതി ആസൂത്രണം ചെയ്യണമെന്നുണ്ട്. അത് നടപ്പിലാക്കാനായാലും ഇല്ലെങ്കിലും അധികം താമസിയാതെ റിട്ടയര്‍മെന്റ് ജീവിതത്തിലേക്ക് കടക്കും. കൂട്ടായ്മകളില്‍ നിന്നെല്ലാം പുറത്ത് കടക്കാന്‍ ആഗ്രഹിക്കുന്നു. ഒരു ദിവസത്തില്‍ 24 മണിക്കൂര്‍ തികയുന്നില്ല എന്ന അവസ്ഥ മാറ്റിയെടുക്കാന്‍ വേണ്ടി മാത്രാമാണിത്. ഒരുപാട് വായിക്കണമെന്നും അല്‍പ്പമെങ്കിലും സാക്ഷരനാകണമെന്നുമുള്ള ആഗ്രഹം നടപ്പിലാക്കണമെങ്കില്‍ നിലവിലുള്ള പല കൂട്ടായ്മകളും ഉപേക്ഷിക്കേണ്ടിവരും. 
20. സാജു ജോണിനെ നേരിട്ട് കണ്ടപ്പോള്‍ ആ വ്യക്തി  “നട്ടപ്പിരാന്തന്‍” എന്ന നാമത്തോട് എത്രമാത്രം കൂറ് പുലര്‍ത്തുന്നുവെന്നാണ് തോന്നിയത്? 
നട്ടപ്രാന്തന്‍ എന്ന ആ പേര് പൂര്‍ണ്ണമായും നീതി പുലര്‍ത്തുന്നുണ്ട് എന്നാണ് മനസ്സിലാക്കാനായത്. ഭ്രാന്തിന്റെ അംശം പോലും ഇല്ലാത്ത, അല്ലെങ്കില്‍ എഴുത്തില്‍ കാണിക്കുന്ന സ്വഭാവത്തിന്റെ ലാഞ്ചനപോലും ഇല്ലാത്ത ഒരു വ്യക്തി, സ്വയം നട്ടപ്രാന്തന്‍ എന്ന് പരിചയപ്പെടുത്തണമെങ്കില്‍ അത്  നല്ല ഒന്നാന്തരം നെല്ലിക്കാത്തളം വെക്കേണ്ട തരത്തിലുള്ള മൂത്തുപോയ നട്ടപ്രാന്തല്ലെങ്കില്‍ പിന്നെ എന്താണ് ? :)   

63 comments:

saju john said...

ഇനി ഇത് മുടങ്ങാതെ നടത്താന്‍ കാത്തോളനെയീശ്വരാ........

സുനിൽ കൃഷ്ണൻ(Sunil Krishnan) said...

കുറച്ചു ദിവസത്തെ ഇടവേളയ്ക്ക് ശേഷം വന്നതുകൊണ്ടാവാം കൂടുതല്‍ മികച്ച ചോദ്യങ്ങള്‍...അവയില്‍ ഓരോന്നിനോടും വളരെ വ്യക്തമായും വളരെയേറെ തുറന്ന മനസ്സോടും നിരക്ഷരന്‍ പ്രതികരിക്കുകയും ചെയ്തിരിക്കുന്നു...

ഈ ശൃംഘലയിലെ ഏറ്റവും മികച്ച അഭിമുഖങ്ങളിലൊന്നാണു ഇതെന്ന് നിസംശയം പറയാം

എന്റെ രണ്ട് സുഹൃത്തുക്കള്‍ക്കും അഭിനന്ദനങ്ങള്‍ !

Unknown said...

വളരെ നന്നായിരിക്കുന്നു ..
ചോദ്യങ്ങള്‍ സൃഷ്‌ടിച്ച നട്ടാപ്പി ചേട്ടനും .. മനോഹരമമായ മറുപടികള്‍ നല്‍കിയ നീരു ചേട്ടനും അഭിനന്ദങ്ങള്‍ ...

manojpattat said...

തുറന്നു പറച്ചിലിന്റെ സത്യസന്ധത

ആളവന്‍താന്‍ said...

എല്ലാ ചോദ്യങ്ങളും മികച്ചത് എന്ന് അഭിപ്രായമില്ല. എന്നാലും ഭൂരിഭാഗവും നിലവാരം പുലര്‍ത്തി. മറുപടികളില്‍ വളരെ തുറന്ന സമീപനം കാണിച്ച നിരക്ഷരനെ ഒരു വ്യക്തി എന്ന നിലയില്‍ കൂടുതല്‍ അടുത്തറിയാന്‍ കഴിയുകയും ചെയ്തു. എന്നാലും ഏറ്റവും ഇഷ്ട്ടപ്പെട്ട മറുപടി അവസാന ഉരുളയ്ക്ക് പകരം കിട്ടിയ ഉപ്പേരി തന്നെ...!!

Manoraj said...

നട്ട്സ്,

ചോദ്യങ്ങള്‍ മനോഹരം. ഉത്തരങ്ങളും. ഈ അഭിമുഖം ഇനി മുടങ്ങാതെ കൃത്യമായ ഒരു ഇടവേളയില്‍ വരണമെന്ന് ഒരു അഭ്യര്‍ത്ഥന. ഒന്നുകില്‍ മാസത്തില്‍ രണ്ടെന്നോ അല്ലെങ്കില്‍ ഒന്നെന്നോ ഉള്ള കണക്കില്‍. അപ്പോള്‍ വായനക്കാര്‍ക്കും അത് വളരെ നല്ല അനുഭവമാവും. താങ്കള്‍ക്ക് അത് കൂടുതല്‍ ഉത്തരവാദിത്വത്തോടെ ഇതിനെ സമീപിക്കാന്‍ സഹായിക്കുകയും ചെയ്യും.

നിരക്ഷരന്‍ പറഞ്ഞ ഉത്തരങ്ങളില്‍ രാഷ്ട്രീയത്തെ പറ്റിയും മതത്തെ പറ്റിയുമുള്ള കാഴ്ചപാടുകള്‍.. അല്ലെങ്കില്‍ അവയില്‍ നിന്നുള്ള ഒളിച്ചോട്ടമല്ല മറിച്ച് ഒഴിഞ്ഞ് നില്‍പ്പാണെന്ന പരാമര്‍ശം അത് വളരെ നന്നായി തോന്നി. എനിക്ക് തോന്നിയിട്ടുള്ളതും അങ്ങിനെ തന്നെയാണ്. എത്ര സത്യങ്ങള്‍ നിരത്തിയാലും എന്റെ വിശ്വാസങ്ങളെ അല്ലെങ്കില്‍ ഞാന്‍ വിശ്വസിക്കുന്ന പ്രത്യയശാസ്ത്രം തന്നെ ശരി എന്ന് ശഠിക്കുന്നവരുടെ എണ്ണം ബൂലോകത്ത് കൂടി വരുന്നു എന്നത് യാദാര്‍ത്ഥ്യം തന്നെ.

riyaas said...

ഉത്തരങ്ങളൂം ചോദ്യങ്ങളും ഒരുപാടിഷ്ടമായി..

പാവത്താൻ said...

ഇതു മുറ്റങ്ങാതെ നടത്താന്‍ കാത്തോളണേ ഈശ്വരാ..
ഈ പ്രാന്ത് ഒരിക്കലും മാറാതിരിക്കാന്‍ അനുഗ്രഹിക്കണേ ഈശ്വരാ..
മനുഷ്യന്മാര്‍ കൂടുതല്‍ കൂടുതല്‍ നിരക്ഷരരായിത്തീരാന്‍ കനിയണേ ഈശ്വരാ...

ഒഴാക്കന്‍. said...

നട്ട്സ് , കലക്കി

krish | കൃഷ് said...

അഭിമുഖം നന്നായിട്ടുന്ട്ട്.

kARNOr(കാര്‍ന്നോര്) said...

Very interesting.. Please come back soon with next ..

ബിജുകുമാര്‍ alakode said...

നിരക്ഷരന്‍ എന്ന ബ്ലോഗറെ പറ്റി കൂടുതല്‍ അറിയാന്‍ ഇടയാക്കിയതില്‍ നട്ടപിരാന്തനു നന്ദി. സത്യസന്ധതയുടെ നറുഗന്ധം പൊഴിയുന്ന മറുപടികള്‍ ഈ അഭിമുഖത്തെ സമ്പുഷ്ടമാക്കുന്നു. നിരക്ഷരന്റെ സാമൂഹ്യ സേവനപരിപാടികള്‍ക്ക് എല്ലാ ആശംസകളും.

മേല്‍പ്പത്തൂരാന്‍ said...

"ഒരു വ്യക്തിയെന്ന നിലയില്‍ നിരക്ഷരനോട് എനിക്ക് ആദരവും ഒപ്പം അതിലേറെ അസൂയമാണെനിക്ക് തോന്നുന്നത്. സഹജീവികളോടും ഒപ്പം താന്‍ ജീവിക്കുന്ന ഭൂമിയോടും കാണിക്കുന്ന കരുതലും സഹാനുഭുതിയുമാണ് എനിക്ക് നിരക്ഷരനില്‍ ആദരവുണ്ടാക്കുന്നത്, എന്നാല്‍ മറിച്ച് അസൂയയുളവാക്കുന്നത്, അദ്ദേഹത്തിന്റെ സൌഹൃദത്തിന്റെ വ്യാപ്തിയും, അതിലൂടെ അനുഭവിക്കുന്ന ഊഷ്മളതയും ആലോചിച്ചിട്ടാണ്. നിരക്ഷരന്റെ കൂടെ ഒരു യാത്രയില്‍ സഹയാത്രികനാകാന്‍ ആഗ്രഹിക്കാത്ത ബ്ലോഗേഴ്സ് വളരെ കുറവായിരിക്കും. ഒരു പക്ഷെ നിരക്ഷരന്‍ എഴുതുന്ന യാത്രക്കുറിപ്പുകള്‍ വായിച്ച് അവര്‍ സ്വയം നിരക്ഷരന്‍ ആവുന്നുമുണ്ടാവാം. ."

എല്ലാവര്‍ക്കും “നിരക്ഷരനേപ്പറ്റി ഈ അഭിപ്രായം ആണെന്നാണ്‌ എനിക്കും തോന്നുന്നത്,നിരക്ഷരന്റെ അക്ഷരങ്ങളില്‍ അദ്ദേഹത്തിന്റെ വെക്തിത്വം(നിരക്ഷരത്വം:)) ഒളീഞ്ഞൂകിടപ്പുണ്ടെന്ന് ഞാന്‍ വിശ്വസിക്കുന്നു.:)

നല്ല ഒരു അഭിമുഖം ഒരുക്കിയ നട്ടാപ്പിക്ക് ഒരായിരം“ചെമ്പരത്തിപ്പൂക്കള്‍”«lol»

ചേച്ചിപ്പെണ്ണ്‍ said...

Happy reading .. :)

shaji.k said...

ഇത് കലക്കി നട്ട്സ്, ഇതുവരെ ഇവിടെ വായിച്ചതില്‍ മികച്ചത് എന്നുതന്നെ എന്ന് പറയാം.യാത്രകളെ പറ്റി അധികം ചോദിച്ചില്ല എന്ന പരാതി ഉണ്ട് എനിക്ക്. നന്നായി ആശംസകള്‍ രണ്ടു പേര്‍ക്കും.

Unknown said...

നിരക്ഷരന്‍ എന്നെ പലപ്പോഴുംഅദ്ഭുതപ്പെടുത്തിയിട്ടുണ്ട്. മോഷ്ടിച്ച ലേഖനം ബ്ലോഗില്‍ പോസ്റ്റിയ വ്യക്തിക്കെതിരേ പടനയിച്ചപ്പോഴും 3 വര്‍ഷങ്ങള്‍ക്കു മുമ്പ് എഴുതിയ യാത്രാക്കുറിപ്പിനെതിരേ പ്രസ്തുത മനയുടെ ഉടമ രംഗത്തുവന്നപ്പോള്‍ കാര്യകാരണസഹിതം വ്യക്തമാക്കി ആ പോസ്റ്റ് പിന്‍വലിച്ചപ്പോഴും മനോജേട്ടനോടുള്ള എന്റെ ബഹുമാനം വര്‍ധിപ്പിച്ചതേയുള്ളൂ.
നട്ടപ്പിരാന്തന്റെ ഉദ്യമത്തിന് എല്ലാ ഭാവുകങ്ങളും നേരുന്നു. ഇങ്ങനെയൊരു വായനക്ക് സാഹചര്യമൊരുക്കിയതിന് നന്ദി. സംഭാഷണം ഏറെയിഷ്ടപ്പെട്ടു. തുടര്‍ന്നുള്ള അഭിമുഖങ്ങള്‍ക്ക് ക്ഷമയില്ലാതെ കാത്തിരിക്കട്ടെ.....
സ്‌നേഹപൂര്‍വം
സ്പന്ദനം.

Junaiths said...

നട്ടേട്ടാ കിടുക്ക് ചോദ്യങ്ങള്‍..നീരൂജി കുറിക്കു കൊള്ളുന്ന ഉത്തരങ്ങള്‍ ...
ഈ പംക്തി തുടരുക തന്നെ വേണം..

ranji said...

നന്നായി. ഇഷ്ടമായി. :-)

Unknown said...

നല്ല ഒരു അഭിമുഖം!! ആശംസകള്‍ നട്ട്സ്, നിരക്ഷരന്‍!!
ഈ പരമ്പര ഇനിയും തുടരാന്‍ ആവട്ടെ!!!
ആശംസകള്‍!!

Cartoonist said...

ഉത്തരം 19 ശ്രദ്ധിച്ചോളൂ.
ടി സംഭവത്തില്‍പ്പറഞ്ഞ പെന്‍ഷന്‍ പ്ലാന്‍
അവനോനുള്ളതാണോ ? :)

Pradeep Narayanan Nair said...

ഹൃദയം തുറന്ന അഭിമുഖം അവതരിപ്പിച്ചതിന് നന്ദി !
വിരമിക്കാന്‍ സമയമായോ ? . .
മീണ്ടും സന്ധിക്കും വരെ വണക്കം ..
നാട്ടാപ്പിക്കും നിരക്ഷരനും ആശംസകള്‍ ..

kichu / കിച്ചു said...

നീരൂ.. നട്ട്സ്..
കലക്കികളഞ്ഞല്ലോ :))

ഒരു പിരാന്തനും ഒരു അക്ഷരാഭ്യാസമില്ലാത്തവനും എങ്ങനെയൊക്കെയാ വര്‍ത്താനം പറയുക എന്ന് ഇപ്പം തെരിഞ്ഞ് അയ്യാ.... ഒന്ന് ചേര്‍ന്ന് നിന്നേ. രണ്ടിന്റെം തല കൂട്ടി ഒന്ന് പൊട്ടിക്കട്ടെ :)

Ashly said...

:) thanks ...രണ്ടു പേര്‍ക്കും !!!

Subiraj Raju said...
This comment has been removed by the author.
Subiraj Raju said...

ആശംസകൾ രണ്ടുപേർക്കൂം, പല ചോദ്യങ്ങളെയു പോലെതന്നെ അവാസാനത്തെ ഉത്തരം കലക്കി...

സജി said...

ഞാനും മൂര്‍ഖഞ്ചേട്ടനും കൂടി ഒരാളെ കൊത്തിക്കൊന്നു എന്നു ഞാഞ്ഞൂള്‍ പറഞ്ഞതുപോലെ, ഞാനും നിരക്ഷരനും യാത്ര ചെയ്തു എന്നു പറയുമ്പോള്‍ ഒരു രോമാഞ്ചകഞ്ചുകംസ്....

യാത്ര ചെയ്തു മടുത്തു എന്നു ഞാന്‍ ആദ്യമായി പറയുന്നത്, നിരക്ഷരന്റെ കൂടെകൂടിയായിരുന്നു. തുടര്‍ച്ചയായ യാത്രചെയ്ത് തളര്‍ന്നു മനോജിന്റെ വീട്ടില്‍ ചെന്നു കയറിയപ്പോള്‍ അദ്ദേഹത്തിന്റെ വാമ ഭാഗം പറഞ്ഞത് ഇങ്ങനെയാണ്‍,"യാത്ര ചെയ്തു മടുത്തു എന്നു മനോജ് പറഞ്ഞു ഇന്നു വരെ കേട്ടിട്ടില്ല" . ഞാന്‍ ശരിക്കും തളര്‍ന്നു പോയിരുന്നു.
തുടര്‍ച്ചയായി വണ്ടി ഓടിക്കുന്നതിലും മനോജ് മഹാ കേമന്‍ തന്നെ. (പോള്‍ നീരാളീനെ പ്രവചിക്കാന്‍ പഠിപ്പിക്കേണ്ടല്ലോ!)



ചില മനുഷ്യരോട് ഇടപെടുമ്പോള്‍ ഒരു ശാന്തതയും, അനായാസതയും തോന്നാറില്ലേ. മസിലു പിടിക്കാതെ, കരുതിക്കൂട്ടി സൂക്ഷിച്ചു സംസാരിക്കാതെ, സ്വാഭാവികമായ ഇടപെടല്‍- അങ്ങനെയുള്ള യാത്രകള്‍ -സംസാരങ്ങള്‍ ആരും മറക്കില്ല അല്ലേ....

അങ്ങിനെയെങ്കില്‍ നിരക്ഷരനുമായുള്ള യാത്രകളും ആരും മറക്കില്ല...

Unknown said...

ഈശ്വരാ ഈ നിരക്ഷരനെയാണല്ലോ ഞാന്‍.......

എവിടെ ക്ലിക്കിയാലാ ഒന്ന് ലൈക്കുക ? :P

K@nn(())raan*خلي ولي said...

തുടക്കം മുതല്‍ കണ്ണൂരാനെ അത്ഭുതപ്പെടുത്തുന്ന വ്യക്തിയാണ് മനുവേട്ടന്‍. നെറ്റില്‍ ഇത്ര നേരം ഇരുന്നു യാത്രകള്‍ കുത്തിക്കുറിക്കുന്നത് തന്നെ അദ്ദേഹം ചെയ്യുന്ന പുണ്യമാണ്.
ഇനിയും ആ യാത്ര തുടരട്ടെ എന്നാശംസിക്കുന്നു.

നട്ടപ്പിരാന്താ, നന്നായി ഈ പോസ്റ്റ്‌.

പൊറാടത്ത് said...

Congrats Nuts...

iniyum mutangaathe thutaroo

visadamaaya abhipraayam pinneet

Manju Manoj said...

നല്ല അഭിമുഖം......നല്ല ചോദ്യങ്ങളും അതിലേറെ ഭംഗിയായ ഉത്തരങ്ങളും......

jayanEvoor said...

ചെറായി മീറ്റിലാണ് ആദ്യമായി നിരക്ഷരനെ കാണുന്നത്....

പിന്നീട് വിശാലൻ ആൻഡ് കമ്പനിക്കൊപ്പം വീണ്ടും ചെറായിയിൽ...

ഈയടുത്ത് വയനാട്ടിലെ പാവങ്ങൾക്കുള്ള വസ്ത്രസമാഹരണത്തിൽ തൃപ്പൂണിത്തുറ ആ‍യുർവേദകോളേജിൽ വച്ച്...

ശാന്തനായ, ലക്ഷ്യബോധമുള്ള മനുഷ്യൻ!

നട്ട്‌സ്,
നല്ല ചോദ്യങ്ങൾ, നല്ല മറുപടികൾ!

നിരക്ഷരൻ said...

ഇത്തിരി സ്ഥലം തരൂ. ഒന്ന് ട്രാക്ക് ചെയ്തോട്ടേ... പ്ലീസ്... :)

വിനുവേട്ടന്‍ said...

രണ്ടു പേരെയും അടുത്തറിയാന്‍ കഴിഞ്ഞതില്‍ വളരെ സന്തോഷം.

ഇരുവര്‍ക്കും എല്ലാവിധ ഭാവുകങ്ങളും...

അലി said...

നിര്‍നട്ടപ്പിരാന്തന്‍!

Unknown said...

മനോഹരം..... !!
എനിക്കൊരു ബ്ലോഗു തുടങ്ങാനുള്ള പ്രചോദനം കിട്ടിയത് നിരക്ഷരന്റെ പോസ്റ്റുകള്‍ വായിച്ചിട്ടാണ്. തീര്‍ച്ച്ചയ്യായും ഒന്ന് നേരിട്ട് പരിചയപെടണം ഈ വ്യക്തിയെ....അത്രയ്ക്ക് നല്ല പെരുമാറ്റം.

Minesh Ramanunni said...

കൊള്ളാം നട്സ്. നീരു, നട്സ്, പിന്നെ അച്ചായന്‍ അങ്ങനെ ഇതില്‍ പ്രതിപാദിച്ചിരിക്കുന്ന മൂന്നു ബൂലോക ഗടികളെയും നേരിട്ട് കാണാനും പരിചയപ്പെടാനും കഴിഞ്ഞു എന്ന് ഓര്‍ക്കുമ്പോള്‍ അച്ചായന്‍ മുകളില്‍ പറഞ്ഞ രോമാന്ച്ച കന്ച്ചുകംസ് ടിയാനും തോന്നുന്നു.
നീരുവിനും നട്സിനും ആശംസകള്‍ .

ഒരു യാത്രികന്‍ said...

നന്നായി."ഒരു മരം വെട്ടുമ്പോളോ ഒരു മല ഇടിക്കപ്പെടുമ്പോഴോ വിലപിക്കാത്തവന് ഏതെങ്കിലും ഒരു ആരാധനാലയം തകര്‍ക്കപ്പെടുമ്പോള്‍ വികാരം കൊള്ളാന്‍ അവകാശമില്ലെന്ന് ഞാന്‍ പറയും".
ഇതെനിക്ക് ഏറെ ഇഷ്ടമായി........സസ്നേഹം

ഗീത said...

ചോദ്യങ്ങളും ഉത്തരങ്ങളും കിടിലോൽക്കിടിലം.
നിരക്ഷരനെ നേരിട്ട് കാണാനും ഒരുമിച്ചൊരു കുഞ്ഞുയാത്ര ചെയ്യാനും ഭാഗ്യം ലഭിച്ചിട്ടുള്ള ആളാണ് ഞാൻ. ശാന്തതയും നിശ്ശബ്ദതയും നിറഞ്ഞ ഏതു ദേവാലയത്തിലും, അത് ഏത് മതത്തിന്റെയായാലും, അവിടെ ദൈവസാന്നിദ്ധ്യം ഉണ്ടെന്ന നീരുവിന്റെ വിശ്വാസം അനുഭവവേദ്യമാക്കി തരുകയും ചെയ്തു. ക്ഷിപ്രകോപിയും അൽ‌പ്പനും അസൂയാലുവുമായ മനോജ് രവീന്ദ്രനെയല്ലായിരുന്നു, പകരം ശാന്തനും യാത്രാപ്രിയനും സംസാരപ്രിയനും അനേകം സ്വപ്നങ്ങൾ മനസ്സിൽ സൂക്ഷിക്കുന്നയാളും സർവോപരി പരോപകാരിയും ആയ നീരുവിനെ ആയിരുന്നു ഞാൻ കണ്ടത്.

ഷൈജൻ കാക്കര said...

"മനോജ് രവീന്ദ്രന്‍ എന്ന വ്യക്തി ക്ഷിപ്രകോപിയാണ്, അല്‍പ്പനാണ്, അസൂയാലുവാണ്, അഹങ്കാരിയാണ്. അയാള്‍ക്ക് വിദ്യാഭ്യാസമുണ്ടായിരിക്കാം. പക്ഷെ ഒരു മനുഷ്യനുണ്ടാകേണ്ട മറ്റ് പല നല്ല ഗുണങ്ങളും അയാള്‍ക്കില്ല. അക്ഷരാഭ്യാസമില്ലെങ്കിലും നിരക്ഷരന് അയാളുടെ കോപം മനോജ് രവീന്ദ്രനേക്കാള്‍ നന്നായി നിയന്ത്രിക്കാനാകുന്നുണ്ട്."

എനിക്കിഷ്ടപ്പെട്ടു... ഒരു അധിക നിമിക്ഷം... വീണ്ടുവിചാരത്തിന്‌... ശരിയായ തീരുമാനത്തിന്‌...

Unknown said...

കണ്ടിട്ടില്ലാത്ത ആളുകളെ ഇങ്ങനെ അടുത്ത് പരച്ചയപ്പെടാന്‍ സാധിച്ചു.

നിരുവിനും നട്സിനും അഭിനന്ദനങ്ങള്‍, ഇനിയും അഭിമുഖങ്ങള്‍ തുടരണം.

കുഞ്ഞൂസ് (Kunjuss) said...

തികവുറ്റ ചോദ്യങ്ങളും പ്രതികരണങ്ങളുമായി ഈ ബ്ലാക്ക്‌ & വൈറ്റ് അഭിമുഖം വളരെ മികച്ചതായി. നിരക്ഷരനോട് ഇച്ചിരി അസൂയയും ഒത്തിരി ആദരവും ഉണ്ട്,യാത്രകളെക്കുറിച്ച് ഒന്നും ചോദിച്ചില്ലല്ലോ എന്ന പരാതി നട്ടപ്പിരാന്തനോടും!

രണ്ടു പേര്‍ക്കും ആശംസകള്‍ നേരുന്നു....

മാണിക്യം said...

ഇത് ബ്ലാക്ക് ആന്‍ഡ് വൈറ്റ് അല്ല
നല്ല കളര്‍ ഫുള്‍ അഭിമുഖമായിരുന്നു....
നല്ല ചോദ്യങ്ങള്‍
മനസ്സിലേയ്ക്ക് തുളച്ചിറങ്ങുന്ന ഉത്തരങ്ങള്‍.
സത്യം പറയാമല്ലൊ നല്ല കുശുമ്പ് തോന്നാറുണ്ട്
ഈ സഞ്ചാരികളോട്, ഒപ്പം അകമഴിഞ്ഞ ആദരവും ..
യാത്രാവിവരണം വായിച്ചു തീരുമ്പോള്‍ കൂടെ ഞാനുമുണ്ടായിരുന്നു എന്ന തോന്നല്‍ വരാനും മാത്രം വിശദാംശങ്ങള്‍ അടങ്ങിയ വിവരണങ്ങള്‍,
മനസ്സില്‍ പതിയുന്ന മനോഹരമായ ചിത്രങ്ങള്‍....

എന്റെ കഴിഞ്ഞ അവധിക്കാലത്ത് നിരക്ഷരനേയും സജിയേയും നേരില്‍ കാണാന്‍ സാധിച്ചു. :)
ഇനി ഒരു പിരാന്തനെ കൂടെ കണ്ടാല്‍ .........

Unknown said...

എന്തായാലും മനോജേട്ടനെ മനസിലാക്കൻ പറ്റിയല്ലോ ...നട്ട്സ് വീണ്ടും ഒരു ചരിത്ര ഗാഥ രചിച്ചിരിക്കുന്നു

Pranavam Ravikumar said...

ഒരു ഇടവേളയ്ക്കു ശേഷം നല്ലൊരു അഭിമുഖം.. നന്നായി ആസ്വദിച്ചു.. നിരക്ഷരന് എന്റെ ആശംസകളും...

NPT said...

കൊള്ളാം നന്നായിട്ടുണ്ട് അഭിമുഖം....

..::വഴിപോക്കന്‍[Vazhipokkan] | സി.പി.ദിനേശ് said...

നന്നായി

കാട്ടിപ്പരുത്തി said...

നല്ല ചൊദ്യങ്ങളും നല്ല ഉത്തരങ്ങളും- ആശംസകൾ

ഹാപ്പി ബാച്ചിലേഴ്സ് said...

ഇനി ഇത് മുടങ്ങാതെ നടത്താന്‍ കാത്തോളനെയീശ്വരാ.......

നട്സേട്ടാ,
അതെ അത് തന്നെയാണ് പ്രാര്‍ത്ഥന.
route മാറ്റി ഓടുന്നു എന്നൊക്കെ കണ്ടിരുന്നു, കുഴപ്പമില്ല. പക്ഷെ ഈ പംക്തി നിര്‍ത്തരുത്.
അറിയാത്ത പ്രഗത്ഭരെ അറിയാന്‍ ഒരു അവസരം.

ഇത്തവണയും, അഭിമുഖം നന്നായി

Unknown said...

തികച്ചും വേറിട്ട ഒരു അഭിമുഖം.
ചോദ്യോത്തരങ്ങള്‍ രസകരം.
ഇനിയും ഇതുപോലെയുള്ള അഭിമുഖങ്ങള്‍ പോരട്ടേ!

വീകെ said...

നന്നായി ഈ പരിചയപ്പെടുത്തൽ..
നിരക്ഷരനെ നേരിൽ കാണാനുള്ള അവസരം ഞാൻ പാഴാക്കിയവനാണ്...ഖേദമുണ്ട്..

നിരക്ഷരനും നട്ടാപ്പിച്ചായനും ആശംസകൾ...

Unknown said...

:))

Salini Vineeth said...

നിരക്ഷരനെ പരിചയപ്പെടുത്തിയതിനു നന്ദി ... ഇനിയും തുടരുക

ചാർ‌വാകൻ‌ said...

ബ്ലോഗ്ഗിൽ വന്നതില്പിന്നെ പരിചയപ്പെട്ട വ്യക്തികളിൽ ഇന്നും സജീവമായി ബന്ധം നിലനിർത്തുന്ന വ്യക്തിയെ,ഇങ്ങനെ പരിചയപ്പെടുത്തിയത് നന്നായി.നട്ടപ്റാന്താ...

നിരക്ഷരൻ said...

അഭിമുഖം വായിച്ച് അഭിപ്രായങ്ങൾ അറിയിച്ച എല്ലാവർക്കും നന്ദി.

നട്ട്സ്, ഒരു കൊച്ചു അഭിമുഖം ഫേസ് ബുക്കിലെ എന്റെ മഴ ഗ്രൂപ്പുകാർ നടത്തിയിരുന്നെങ്കിലും ആദ്യമായാണ് ഇത്രയും സുദീർഘമായ ഒന്ന്. മനസ്സ് തുറക്കാൻ അവസരം തന്നതിന് നട്ട്‌സിനോടും ഉള്ള് നിറഞ്ഞ നന്ദി രേഖപ്പെടുത്തുന്നു.

പരമ്പര നിന്നുപോകാതെ നോക്കുമല്ലോ.

ഉസ്മാന്‍ പള്ളിക്കരയില്‍ said...

ഹ്ര്‌ദ്യം.

നട്ടുവിനും നീരുവിനും ഒപ്പത്തിനൊപ്പം നന്ദി.

ഷബീര്‍ - തിരിച്ചിലാന്‍ said...

നല്ല ഫസ്റ്റ്ക്ലാസ്സ് ചോദ്യങ്ങളും ഫസ്റ്റ്ക്ലാസ്സ് ഉത്തരങ്ങളും. നിരക്ഷരന്‍ എന്ന ബ്ലോഗറെ മനസ്സിലാക്കാന്‍ സാധിച്ചതില്‍ അതിയായ സന്തോഷം... എന്നെ ആദ്യമായി ആഗ്രിഗേറ്ററിലേക്ക് നയിച്ചതിനുള്ള നന്ദിയും നിരക്ഷരനോട് ഞാന്‍ ഇവിടെ രേഖപ്പെടുത്തുന്നു.

MOIDEEN ANGADIMUGAR said...

അല്പം ചുരുക്കി എഴുതാമായിരുന്നില്ലേ ?
ഏതായാലും കൊള്ളാം.നന്നായിട്ടുണ്ട്

SHANAVAS said...

വളരെ നല്ല അഭിമുഖം.ഇത് അഭിമുഖം തന്നെയോ?എന്തായാലും റിട്ടയര്‍ ചെയ്യുന്നത് ആലോചിച്ചു മതി കേട്ടോ.

മഷി പുരളാന്‍ യോഗ്യതയുള്ള അസ്സല്‍ ശൈലി.ആശംസകള്‍.

ajith said...

നല്ല ചോദ്യങ്ങളും വളരെ നല്ല ഉത്തരങ്ങളും. കുറെക്കൂടി ആഴങ്ങളിലേയ്ക്കിറങ്ങുന്ന ചോദ്യങ്ങള്‍ ആയിരുന്നുവെങ്കില്‍ കുറെക്കൂടി വ്യക്തമായ ഒരു ചിത്രം ലഭിച്ചേനെ എന്നൊരു തോന്നല്‍ ഉണ്ട്.

Manikandan said...

നല്ല അഭിമുഖം. ബ്ലോഗ് സംഗമങ്ങൾ ഇന്നത്തെ അത്രയും പ്രചാരത്തിലില്ലാത്തകാലത്താണ് ഞാൻ മനോജേട്ടനെ പരിചയപ്പെടുന്നത്. അന്നു മുതൽ പലപ്പോഴും അദ്ദേഹത്തിന്റെ സഹയങ്ങളും ഉപദേശങ്ങളും ലഭിച്ചിട്ടുണ്ട്. അദ്ദേഹത്തെക്കുറിച്ച് കൂടുതൽ അറിയാൻ ഈ അഭിമുഖം സഹായിച്ചു. ചോദ്യകർത്താവിനും, മനോജേട്ടനും നന്ദി, ആശംസകൾ.

Unknown said...

"ഒച്ചപ്പാടും ബഹളവും ഉള്ള ഒരു ദേവാലയത്തിലും മരുന്നിന് പോലും ദൈവമില്ല, അവിടൊക്കെ പോകുന്നത് വീഗാലാന്റില്‍ പോകുന്നതുപോലെ ഒരു പ്രക്രിയ മാത്രമാണെന്നും ഞാന്‍ വിശ്വസിക്കുന്നു"

ഇതു പോലെ ഒരു പ്രസ്താവന ഒരു സിക്കുലര്‍ വനിത നടത്തിയാതായി അറിവുണ്ട്.

ഒരു സംശയം -
എന്താ സിക്കുലര്‍ 'എക'ദൈവത്തിന് ബഹളം അലര്‍ജിയാണോ?

Unknown said...

ഈ ചോദ്യം നിരക്ഷരനോട് ആണ് ആകേണ്ടിയിരുന്നത്.

പക്ഷേ ബ്ലോഗ്ഗര്‍മാരുടെ കുലപതിയായ് ആ ദേഹം 'കമ്മനസ് ദിലിറ്റ്' ' ബ്ലോക്ക്' ഇത്യാദി കാര്യങളുമായിയാണ് ഇത്തരം ചോദ്യങ്ങളെ നേരിടുന്നത്.

Rakesh KN / Vandipranthan said...

ellam thakarthu :)., enikku vallathe ishtamayi., randu perem..